الدولة الاسلامية ..مدنية..!

فى سؤال محير الناس و مخليهم يكلو فى بعض و يموتو بعض و يتخانقو.... الدولة اللى جاية تبقى مدنية ولا دينية....؟؟
بص انا اتكلمت مع اصحابى و اتكلمت مع قرايبى و اتكلمت مع ناس معرفهاش على النت عن الدولة الجاية مدنية ولا دينية ...؟؟
بعد كده قعدت عملت search عن مفهوم الدولة المدنية و مفهوم الدولة الدينية عشان افهم الدنيا ماشية ازاى خصوصا بعد ما فى ناس كفرتنى...
المهم اللى وصلتله انه فى ناس كتيراتكلمت معاها عايزة دولة دينية و قصدهم من دينية دى تطبيق الشريعة ...بس ..ده مفهومه عن الدولة الدينية ..انا بقى لما دورت على التعريف لقيت حاجة غريبة اوى
   ........مفيش حاجة اسمها الدولة الدينية فى الاسلام.....
محدش يشتم و محدش يكفرنى و واحدة واحدة عليا عشان انا غلبان
براحة كده..
تعريف الدولة الدينية و امثلتها : الدولة التى تمارس الحكم الالهى و فيها يحكم الحاكم باسم الله ويكون نائبا عن الله فى المجتمع و يكتسب الحاكم و قوانينه و ممارسته قداسة مطلقة وهى من قداسة الله تعالى..... ده تعريف الدولة الدينية وامثلته ايه :
الدولة فى اوربا فى العصور الوسطى و فكرة حكم الكنيسة و الحكم اللاهوتى و الكلام ده..
بزمتك و دينك يا مثقف يا قارى و لا حتى يا جاهل يا امى عمرك عرفت ان فى التاريخ العربى الاسلامى كان فى دولة با لهيكل و الطريقة دى.. ها..؟؟
طب و ايران هيا مش دولة اسلامية ازارى بيطبقوا نظام زى ده ..
؟؟
احب اقولك انا اعدت ادور على اجابة السؤال ده كتيييير لحد ما لاقتها و هيا : فى حاجة عند الشيعة الاثنى عشرية اسمها ولايه الفقيه و هى نموذج من نماذج الدولة عندهم و بتختلف عن النظام اللى كان فى اوربا فى العصور الوسطى انهم بحسب النموذج بتاعهم الشيعى ان الدولة تقوم علة مؤسسات منها رئيس جمهورية و حكومة و برلمان مع وجود سلطة روحية هى سلطة الفقيه و بيكون ليه سلطات كبيرة ... النموذج ده عند الشيعة و مالوش اى مثيل او نظير عند السنة ...
يعنى عمره مهيطبق عندنا ... هو ده مفهوم الدولة الدينية و زى ما قولنا عمره ما كان موجود من ايام الرسول عليه الصلاة و السلام لحد دلوقتى عند السنة....
يعنى المفهوم الصحيح للدولة الدينية :
      .......هى الدولة التى تستند الى مرجعية دينية......
وده بالفعل اللى احنا فيه بدليل المادة التانية من الدستور الى بتخلى الشريعة الاسلامية هى المصدر الرئيسى للتشريع...ده غير احكام المواريث و احكام الاحوال الشخصية (زواج و طلاق ) ..كل ده مستند للشريعة الاسلامية.....
امال ايه بقى حوار الدولة المدنية ده كمان....اقولك يا سيدى
بعد الفحص و المحص و السيرش برضو وصلت لكام حاجة كده احب اجمعهم على بعض..
اولا يعنى ايه دولة مدنية : هى دولة القانون يعنى مش بلد رئيس و لا حكومة ولا ملك...لا بلد قايمة فعلا على مبدأ الفصل بين السلطات بجد مش زى ايام مبارك الفصل الحمصى..و من الفصل ده هيطلع شوية مبادىْ زى ايه..:
* الشعب مصدر السلطات    * الفصل بين السلطات
*بشرية الحاكم وعدم قدسيته  *حق المواطنة.....الخ
عشان كدة الدولة المدنية ملهاش تعريف ثابت كل المبادىْ دى جزء من التعريف ..انا عن نفسى مش عارف اعرفها لأنها شاملة كل المبادىْ دى
ممكن بقى دقيقة :
تعالى نطبق المبادىْ دى على الاسلام ونشوف بيتعارض معاها ولا لأ...؟؟
لواتكلمنا ان الشعب مصدر السلطات هتلاقى ان الاسلام ادى لكل واحد  الحق انه يخنار الحاكم..ولا ايه...؟
لو اتكلمنا عن الفصل بين السلطات هتلاقى ان الاسلام اول دين نادى بكده..و الادلة كتيير منها فصل سيدنا عمر للقضاء واعطائه سلطات مستقلة بدون تأثير من حد....أعدل الناس...ولا ايه..؟؟
لو اتكلمنا عن بشرية الحاكم و عدم قدسيته هتلاقينا فى الاسلام مبنقولش غير ...لا اله الا الله...ولا ايه...؟؟
لو اتكلمنا عن حق المواطنة هتلاقى ان القرأن قال (لا اكراه فى الدين )...ولا ايه...؟؟
يبقى لو ركزنا شويه هنلاقى ان الدولة فى الاسلام دولةمدنية فى الأصل...ولا أيه....؟؟
جايز اكون غلطان فى حاجات و صح فى حاجات ... انا ده رأى أنا ..أنا لوحدى معيش حد..و مقتنع بيه ..مش عارف صح ولا لأ..؟

....................................و الله اعلم.......................... 
                                                              by 
                                                         salooo7a