عبد المجيد محمود حبيبي

النائب العام... حبيبى ..قبل ما اتكلم عليك بنص كلمة و قبل ما اخبط فيك...
انا طالب فى كلية حقوق .. يعنى زميلك .. كان نفسى اعرف يعنى ايه نائب عام...و طلع الأتى :
                      النائب العام = رأس الهرم فى جهاز النيابة العامة
 و قد سمى نائب عاما أى ينوب نيابة عامة عن المجتمع فى تحريك الدعاوى الجزائية و الأدعاء فيها أمام المحكمة المختصة ..... حيث لا يمتلك المجنى عليه فى الواقعة تحريك الدعوى الجزائية بنفسه عدا الادعاء مدنيا امام المحكمة لطلب التعويض....


                                  يعنى ايه....؟؟؟
يعنى الراجل ده بينوب عننا كلنا فى قضية تخص المجتمع كله..او تخص شخصية عامة او تهم مجموعة من الناس ..يعنى احنا عايزين نحاكم مبارك مثلا....
مينفعش تروح من نفسك ترفع دعوى و تاخد ميعاد للجلسة و الكلام ده...لأ..تروح تقدم بلاغ للراجل ده و هو يحرك الدعوى قدام المحكمة المختصة....


    يعنى وظيفة من اهم الوظائف فى الدولة برتبة وزير...و على فكرة رئيس الجمهورية هو اللى بيعينوا و وزير العدل ملوش أى سلطة عليه....


بعد ما عرفنا حجم الوظيفة و ابعادها عشان نعرف أحنا بنتكلم عن مين...نيجى بقى للوضع الحالى..و للرجل الحالى...عبد المجيد محمود.....!!!!
الراجل ده انا بصراحة احترمته بعد ما وقف فى قضية القمح الفاسدة سنة 2008 و اتكلم  وقال لأ....الراجل ده ممكن يكون محترم بس مش رجل المرحلة ....يعنى ايه..؟
لو بصينا على قرارته من بداية الثورة هتلاقى اغلبها التحفظ على اموال فلان و منع سفر علان وكل دى قرارات بديهية ياخدها أى عيل صغير....
لكن القرارات المصيرية زى احالة لمحكمة زى احالة مبارك للجنايات مجتش غير بعد ضغط...و القرار الأهم و الأخطر قرار نقل مبارك من شرم ...!! ؟؟؟
الداخلية تقولك فى انتظار قرار النائب العام .. ومصلحة السجون كذلك ..والمجلس العسكرى بيقولك فى يد النائب العام..!!
تيجى للنائب العام تلاقى كل يوم نفس الخبرده...النائب العام يرسل لجنة طبية تعاين مستشفى سحن طره..
و تانى يوم يرسل لجنة تعاين حالة الرئيس الصحية...و احنا منعرفش مين اللجنة دى و تقريرها النهائى ايه...؟؟؟
فين الشفافية اللى بتقولو عليها ...؟؟
اعرض التقارير و قول الوضع كذا...و محدش يغلطك 
لكن لأ تانى يوم تقرا ان النائب العام شكل لجنة لمعاينة المستشفى مرة تانية  لتحديد احتياجته من احهزة طبية...و بعدها لجنة تالتة عشان تعاين حالة مين و رابعة عشان ايه....؟؟؟
فى ايه ياعم بقالك 4 شهور بتعمل لجان ...هتنقله قول مش هتنقله برضو قول....
كل اللى اقدر اقوهولك فى الاخر ..عليك ضغوط قول و احنا نحطك فوق دماغنا لكن كده هنحطك تحت رجلينا ...
ممكن تكون راجل محترم و كويس لكن مش رجل المرحلة ...اصل هيا الناس كده فى ناس بتاعت كل المراحل و المواقف و ناس لأ..
خلاص مش أدالليلة أخلع بدرى بدرى و يجى غيرك..و لا ايه..
           كنت بحبك ولاهى با عبد المجيد بس اقول ايه
       كنت مثل الاعلى و انهرت يا ابيههههه.....

                                                                 by
                                                          salooo7a    

Farid El Deeb (Mubarak's lawyer) on CNN 5/29/2011

صباح التحرير....

ناقص كام ساعة وكلنا نكون فى الميدان ان شاء الله ...

فى ناس فى الميدان من دلوقتى....وكمان فى لجان شعبية اتعملت من دلوقتى ..عشان المجلس العسكرى قالها صريحة..

الرسالة (58) ...كانت واضحة وصريحة ..مش هنكون موجودين قال ايه عشان ميحصلش وقيعة..و اعتمدوا علينا عشان نحمى الميدان....حلو اوى الكلام ده احنا متعودين على حماية الميدان..و حافظينوا حتة حتة.. هاتيجى بلطجية هاتيجى شرطة هايجى الجن الازرق ...احنا هنحمى الميدان...
مشفش وش واحد فيكو بكرة..انتو سلمتونا تسليم اهالى ..و هتيجو يوم ما يحصل حاجة تضربونا و تلمونا كلنا ...و تقولو عناصر مندسة و مشبوهة و الكلام الاهبل ده مش هايكل معانا...انتو قولتوها  امنو نفسكو..شكراااااااا...
-----------------------------------------------------------------
تانى حاجة....الاخوااااااااان احب اقولهم هما كمااااااان شكراا...بس دى بجد شكرا لانكم اثبتوا ادام الدنيا كلها انكم ناس ميهمكمش غير مصلحتكو ...و مصلحة الجماعة فوق مصلحة مصر ..اتغريتو فى نفسكم اوى اوى بعد الثورة حسيتو انكم القوة الوحيدة المنظمة فى مصر...جايز يكون الكلام ده صح..بس احب اقولكو زى ما القرموطى قال..مش هتمشونا على مزاجكم..
بس الصراحة تتقال فيكو رجالة ..فيكو رجال زر الفل..شباب الاخوان..قالو احنا نازلين و طظ فى الجماعة...عارفين ليه...؟؟
عشان دول شباب زينا بالظبط ..واضح ان عقليات الجماعة تعتبر من النظام القديم و شباب الاخوان لازم يعملو ثورة على المرشد بتاعهم..الشباب يريد اسقاط المرشد....و كده وارحل و الجو ده....
ده كان موقف الجيش وموقف الاخوان من بكرة ...امال مين اللى ناااااااااااازل....؟؟
اقلك انا...
1-حركة شباب 6 ابريل   2- ائئتلاف شباب الثورة    3-حزب الجبهة و حزب التجمع و حزب الغد و الحزب الناصرى و حزب الكرامة 
4- الاحزاب الليبرالية الجديدة زى المصريين الاحرار و المصرى الديموقراطى و الغد و مصر الحرية
5-حملة دعم البرادعى              6-لجنة الحريات بنقابة المحامين
7-ثوار ماسبيرو              8- و زى ما قولنا شباب الاخوان (الرجالة )
فى الاخر..ربنا يستر بكرة انا عن نفسى متفائل بس بحذر بس بصراحة احلى حاجة بكرة.. مفيش جيش مفيش شرطة مفيش اخوااان مفيش سلفييييين...مع احترامى للناس دى كلها ...الميدان بكرة هيبقى احلى من اى يوم تانى ..
نصيحة لو مش نازل ...جرب اقرا المطالب كمان مرة .. و او فى مطلب واحد بس انت موافق عليه انزل اتمسك بيه....
                                                                         enzl
                                                                 ana nazel   

دى اسمها غباوة

حلقة يسرى فودة اتلغت ليه....؟؟؟؟؟ حد يرد على امى.... الحلقة كانت مع اللواء محسن فنجرى مساعد وزير الدفاع..واللواء محمود حجازى..و بلال فضل و علاء الاسوانى
ريم ماجد طلعت و قالت الحلقة اتلغت لظروووف خارجة عن ارادة يسرى فودة و فريق العمل....؟؟؟
ايه هى بقى الظروف الخارجة دى...ها ..ايه..؟؟؟
هما خايفين من علاء الاسوانى و لا ايه..؟؟؟
ولو هما خايفييييين يوافقوو على الحلقة ليه من الاول...؟؟؟
و هما كدة فاكرين نفسهم ناصحييين ولا ايه يعنى..؟؟ .. دول اغبياء..دول كدة بيقلبو الشارع عليهم اكتر...؟؟
هما لو كولو تمام و شغلهم عاى مية بيضة كانو طلعوا و حطوا صوباعهم فى عين التخييييين...؟؟ ولا ايه..!!
كل يوم بيزيد عدد الناس اللى نازلة يوم 27 بسببهم ولاهى..!!
ربنا يخليهم اينا و لا يحرمناش من غبائهم....
                                                                                     ana nazel ,27 

رسالة رقم (56) ...>> ( A7A )

بص الكلام......
اولا كده و بالمفتشر...بيقوللنا هنضربكم بحجة وجود عناصر مندسة...كوميدية فشخ كلمة مندسة دى ..لا و عناصر مشبوهة خارجية ..الكلام بيعيد نفسه ولا ايه رجعنا تانى لكلمة مندسة و خارجية و اجندة و الشغل الحمصى ده....لا و كان بيقولك تقوم هذه العناصر بتوجيه اتباعها بغرض الاندساس وسط المتظاهرين للتحرش..قلة ادب يعنى و كده فى الزحمة...و استفزازرجال القوات المساحة و الشرطة بغرض حدوث انفلات امنى يؤدى لحدوث مواجهة بين الطرفين...
يعنى هيحصل مواجهة و هنضربكو و نظبطكو و نقبض على اللى خلفوكو كمان...و ملكوش اىحجة احنا نزلنا بياااااان و حذرنا و قولنا ان فى عناصر مندسة و بتاع ايه الى نزلك بقى ؟؟....
هنزل عشان انا مش عبيييط....
عشان من الاخر زى ما وائل عباس قال... ( لو الحرامى قالولو اختار القاضى اللى هيحاكمك هيختار اما قاضى اهبل او فاسد او ماسك عليه حاجة او قاضى ولائه الكامل ليه... )
مبارك اختار المجلس العسكرى اللى ولائه الكامل لمباارك يحاكمه...
يا جدعااااان ... انا عايز ارفع قضية على المجلس العسكرى بتهمة السب و القذف ..قالك عناصر مشبوهة لأ كمان بتهمة اشاعة الذعر ...انا واحد حسيت بذعر بعد البيان ده..و تهمة استغلال الالة الاعلامية...اه حقى...انا فى بلد ديموقراطى...زى ما هما بيقولو...
من الاخر كدة المجلس العسكرى عايز يخوف الناس عشان متنزلش يوم 27 ...هية لهجة البيان بتقول كدة و بيستعدو للانتقام مننا و من الاخر كدة ذنبنا فى رقبة كل واحد مش هينزل ... بجد انا كنت مقتنع بالنزول يوم 27... 100%...بعد البياان ده احب اقول للمجلس العسكرى....شكرااااااااا..... انا كدة مقتنع بالنزول 1000000000%
لو هما شغلهم صح و كله تمام التمام ...هيخافو ايه ما اللى ينزل ينزل....ولا ايه..؟؟؟                                                 
                                                                         ana nazel......

بكرة بروووفة...

بكرة برووووفة... احنا ميعادنا يوم 27 مايو ان شاء الله...بس بردو مفيس مانع ان احنا نعمل بروفة...المطالب معروفة :
- مجلس رئاسى يا ناس (البرادعى قالها من الاول وقالها كتييير اوى و محدش اهتم )
http://www.almasryalyoum.com/node/340389 بتاريخ 5/3/2011
http://www.christian-dogma.com/vb/showthread.php?t=75465  بتاريخ 17/2/2011 .... بعد التنحى بكام يو بس ساعتها كنا بتقول الجيش و لاشعب ايد واحدة
..عشان كدة انا بثق فى الراجل ده و عينتو مستشار سياسى لدماغى...المهم نرجع لومضوعنا
- نقل حسنى الى طرة... شيلنا السباعى اللى كان عمل قلق فى الطب الشرعى و اللى كان بيزور التقارير ..متنقلش لييييييييه....؟؟؟؟
- العيال اللى محبوسة تتطلع ..فى ناس اهاليها متعرفش عنهم حاجة من 9 ابريل احد دلوقتى و من قبل كده كمااااان....
-----------------------------------------------------------------------------
فى حاجة عايز اقولها ...سؤال كده ..فين الشرطة ؟؟
كل اللى يتقال ان الشرطة دى جهاز ابن وسخة مش لاقى حد يلموا ..بس عندهم حق المجلس العسكرى واقف فى ضهرهم مبيجبرهمش انهم ينزلو.. خلاص ينزلو ليييه..؟؟
خلاص زود مطلب عندك ...
-اقاله العيسوى المعفن...
هما حلو امن الدولة و عمللو اعادة هيكلة ..لا انا رأى يحلو جهاز الشرطة كلو و يتعمله اعادة هيكلة من اول الطالب ال اللواء...
و احلى حاجة تتقال فى الموضع دة ultras ahlawy قالوها خلاص

و كما فى الاخر احب اقول...خافى منا يا حكومة

حاجة تقرف.....

فتحى سرور و سوزى و اخرهم كابتن زيكا... طب وبعدين ..نعم يعنى ..؟؟ 

بس فى حاجة عايز اركز عليها و هى :

انا بصفتى طالب قانون ..ركزت شوية فى حيثيات اخلاء سبيل زكريا عزمى..اللهى هيا ايه

http://www.almasryalyoum.com/node/441377

( واشارت المحكمة فى حيثيات قرارها الى انه نظرا لكبر سنه البالغ 72 سنة بالاضافة الى تناولهالعديد من الادوية التى تؤثر على صحته فقد قررت اخلاء سبيله استنادا الى نص المادة 210 اجراءات جنائية التى نصت على ان من حق القاضى اخلاء سبيل المتهم مادام لم يهرب خارج البلاد ولن يؤثر اخلاء سبيله على سير التحقيقات )

يا نهاااااااار اسود ده عنده 72 سنة طلعوه و قالك بايخد ادوية ..يا حرااام .!!

اما حسنى اللى عنده 83 سنة ...هيقولولنا ايه..؟؟

و بعدين انا عمرى ما شفت حيثيات بتعتمد على المرض بس ..

المرض بيبقى دايما عامل مساعد ..علمونا كه.....!!!!

--------------------------------------------------------------------------------

اللعبة الوسخة اياها بتاعت جس النبض اللى الجيش كل شوية بيعملها :

عملها كذا مرة قبل كدة فى حاجات زى تصويت العسكر و حق تصويت المصريين فى الخارج بس ... قولنا ماشى 

لكن امباااااارح... الحوار الحمضان اللى نشرته الشروق عن اعتذار مبارك..

ده بتدبير من المجلس العسكرى...!!!

عايز الدليل ..اولا الشروق انفردت بالخبر و الناس كلها نقلت عنها...

ازاى هما مش هينشروا خبر زى ده غير لو واثقين انه صح.. او واثقين ان محدش هيحاسبهم...

عليا النعمة لو الشروق كانت مطلعة اشاعة و من ورا المجلس كانت اتقفلت بعد خبر زى ده..

لكن اللعبة ايه..؟ ...ارمى الخبر ....الناس زعلانة ز مش موافقة ..

خلاص نزل يا ابنى الرسالة 54 ... و كذب الكلام ده ....!!! 

---------------------------------------------------------------------------------

اخر حاجه شوفوا الفيديو ده...انا مش هاتكلم..حاجة تقرف

تهمة الغباء السياسى

و انا بتفرج على فيلم ايام السادات عجبتنى كلمة قالها الراجل ده....دول لازم يتحاكموا بتهمة الغباء السياسى...لما كان بيتكلم على اللى كان اسمخم وقتها مركز القوى لما كانوا عايزين يعملو فراغ دستورى و يعملوا استقالة جماعية....

الغباء السياسى فى مصر من زماااااااااان اوى اوى و فصوله كتيييييررر.... بس اخرهم عاجبنى اوى 

اصحى الصبح الاقى خبر ان مبارك هيعتذر...و هيرجع كا الفلوس زى ما المدام عملت...يا حلاوة يا ولاد ....

المفروض احنا تقول العفو عند المقدرة .... بص بقى الحتة دى قبلها بيوم المشير طالع يقولك احنا جاتلنا اوامر نضرب نااااار على المتظاهرين و احنا اللى مرضنيش ننفذ الاوامر ....

http://www.youtube.com/watch?v=FwZJ0UOOiUE&feature=share

بقى ونبى تانى يوم يطلع المخلوع ابن التيييييييت...و يقولك هعتذر احن المفروض نعمل ايه 

و انا بصفتى مواطن مصرى جامد اخر حاجة : 

-مش هقبل اعتذار من حد ....

و بصفتى طالب فى كلية حقوق فاشل اخر حاجة :

-بطالب باضافة مادة فى قانون العقوبات ...تحاسب على الغباء السياسى...

                                                                                                                             احمد صالح

أقولك على حاجة.....أنا مش متفائل

بجد دى اول مرة اقول فيها الكلمة دى ( أنا مش متفائل) ....ليه بقولها دلوقتى...؟؟

 عشان حاسس ان احن كل ما بتقدم خطوة لقدام بنرجع عشرة لورا.....مبدئيا اما مستغرب استمرار حالة الغياب و الانفلات الامن لحد انهاردة

المجلس العسكرى مش قادر يقنع الشرطة بالرجوع لمواقعها...!!!

طب بلاش الشرطة خليها على جنب دلوقتى....انا انهاردة سمعت رأى بيقول ان الجيش لو استدعى دفعات السنتين الى فاتو علما ان الجيش بيطلع دفعة كل 3 شهور ..هيبقى عندوا كمية مشاة يقدر يسيطر بيها على البلد فى 24 ساعة..ولا يبقى فى افلات امنى و لا نيلة ...و اخرها اللى حصل عند ماسبيرو انهاردة.. البلطجية جايين على كوبرى 15 مايو مع العلم ان البلطجية مش كائنات فضائية يعنى ممكن نشوفهم ونتعامل معاهم ...مفيش أى تعامل لأ و أيه البلطجية واقفين على الكوبرى و بيضربو نار و مولوتوف و الدنيا جميلة و الجيش واقف يتفرج...يا حلاوة..!!! 

ملحوظة يا جماعة : لازم نتوقع مصيبة بعد كل قرار يطلع بحبس مسؤل كبير( ماما سوزان)

دى كانت اول نقطة مش مخليانى متفائل اللى هيا الانفلات الامنى و بحمل مسؤليتها للمجلس العسكرى

تانى حاجة مش مخلاينى متفائل انى مش حاسس ان فى حاجات كتير اتغيرت

1- لما اشوف موقف زى اللى حصل مع الاعلامية بثينة كامل على الهوا و الامر بوقف البث عسان متكملش يبقى ايه دة ..دة لسة الاعلام موجه و كل حاجة زى ما هية ...امال ثورة ايه

http://www.youtube.com/watch?v=ipMDGtAdhfU....%D8%AF%D9%87 اللينك اتفضل شوف

2- لما اسواق تاكسى يقولى امبارح وقفتنى لجنة بليل على الكورنيش و بيتكلموا مع الزبون راح الظابط ضرب الواد بالقلم ..عادى ...المفروض اكون متفائل ان الظابط دة فى حاجو فى شخصيته اتغيرت...!!

3- لما اتفرج على نوارة نجم و هيا فى اسطبل عنتر اكتر حتة عشوائية فى مصر اللى الناس بيقولو عليهم بلطجية و هما نيستغيثوا بالشرطة العسكرية عشان تحميهم...يقوللهو مبنطاع الجبل ..اخرنا عند الدائرى هو فى حاجة اسمها اولنا ولا اخرنا

4- لما كل يوم يطلع قرار و يرجعوا يلغوه --حركة جس النبض-- حركة قديمة اوى و الناس فاهمها و اخرها منع تصويت المصريين فى الخارج و كان قبلها السماح العسكر بالتصويت فى الانتخابات

لأ و اليه فى الرسالة رقم 51 بيقولك صبر المجلس العسكى قد اوشك على النفاذ انتو بتهددونا يعنى ولا ايه ..!! دةه احنا اللى صبرنا نفذ من زمان

كل اللى اقدر اقولو ربنا معانا لأن اللعبة كبيرة أوى أوى و ممكن انا نكون مش فهمنها و كل يومين فى خازووق جديد ...ربنا يسترها معانا بس برضو انا مش متفائل...

احمد صالح